Schede de Union Scritôrs Furlans
La Union Scritôrs Furlans e ven fondade tal 1982 par mert soredut di Agnul M. Pittana (1930/2005). Insiemit cun lui a dan la lôr adesion al progjet: Renzo Balzan, Zuan Marie Basso, Antoni Beline, Ovidi Colussi, Duili Corgnali, Mario De Apollonia, Zuan Frau, Celso Macor, ZuanCarli Menis, Zuan Nazzi, Riedo Puppo, Nin Rodaro, Luzie Sasso, Raimont Strassolt e Enio Totis.
Finalitât de associazion e je chê di slargjâ l’ûs de lenghe furlane sevi tal cjamp leterari sevi in chel dai mieçs di informazion. Di lavorâ pal svilup e la incressite de lenghe e de culture furlanis, impegnantsi par chest par otignî il ricognossiment istituzionâl de identitât etniche e culturâl furlane. Ricognossiment che juste apont al è po rivât a traviers des leçs regjonâls e statâl di tutele. A fâ cressi la cussience dai furlans sul cont de lôr nazionalitât. A cooperâ cun chês altris associazions che a operin pai stes fins. A infuartî i leams e i contats cui scritôrs e cul ambient culturâl di chês altris tieris ladinis, des Dolomitis e dai Grisons.
Agnul M. Pittana al è stât president de Union Scritôrs Furlans par vincj agns, po inte incarghe si son dâts la volte William Cisilino e Massim Duca. Dal 2004 incà al è dean Renzo Balzan.
Dal 1983, simpri par cure de Union, e ven publicade la riviste (a cadence anuâl) “Gnovis Pagjinis Furlanis” rivade, cul numar jessût il mês di Dicembar stât, al volum XXVIII.
Inzornaments
_________________________________________
Zenâr - 2011
Inte assemblee dai 06/11/2010, pai agns 2010/2012, al è stât confermât dean Renzo Balzan, mentri a fâ part dal consei a son stât nomenâts: Massim Duca (che al davuelzarà ancje la incarghe di segretari), Donât Toffoli, Christian Romanini, William Cisilino, Adrian Cescje e Carli Pup. E fasarà di revisôr dai conts Ane Bogaro, intant che il revisôr suplent al è Nin Rodaro.
