Statût

Cjarte de “Union Scritôrs Furlans”
(Test dai 23 di Març 1982)

Renzo Balzan, Zuan Marie Basso, Antoni Beline, Ovidi Colussi, Duili Corgnali, Mario De Apollonia, Zuan Frau, Celso Macor, Zuan Carli Menis, Zuan Nazzi-Matalon, Albert Picotti, Agnul M. Pittana, Riedo Puppo, Nino Rodaro, Luzie Sasso, Raimont di Strassolt, Ennio Totis, scritôrs di lenghe furlane, si son cjatâts a Udin tal Palaç dal Patriarcje ai 24 di Zenâr 1982, e tal Palaç dal Seminari ai 27 di Fevrâr 1982, e a àn decidût di meti su la Union Scritôrs Furlans.

La Union e varà di funzionâ daûr dai principis di cheste Cjarte.

Art.1

I fins fondamentâi a son di meti adun i scritôrs di lenghe furlane e di sintiments cristians, che a intindin:
a) doprâ la lenghe furlane sedi tal cjamp leterari sedi tal cjamp dai mieçs di informazions;
b) lavorâ a pro dal onôr, dal svilup e de incressite de lenghe e de culture furlane, fins di otignî ancje mediant dal ricognossiment instituzionâl de identitât culturâl furlane;
c) fâ cressi la cussience dai furlans a riviart de lôr nazionalitât;
d) coopera cun spirt di fradaie cu lis altris Sociis che a lavorin cul stes spirt a pro de lenghe e de culture furlane;
e) infuartî i leams cui scritôrs e cul ambient culturâl di chês altris Tieris ladinis, lis Dolomitis e la Romancie.

I argagns
Art.2

La struture funzionâl de Union e je fate de Assemblee, dal president (dean), dal Comitât, dal segretari e dai revisôrs dal cont.

La Assemblee
Art.3

La Assemblee si da dongje une volte ad an. Il so compit al è chel di decidi su la direzion des voris de Union, di elei il president e chei altris membris dal Comitât e i revisôrs dal cont.

Il president (dean)
Art.4

Il president al rapresente uficialmentri la Union; al dure inte sô incarghe doi agns. Al clame dongje la Assemblee e il Comitât; jenfri la clamade e la sintade de Assemblee al à di passâ un trat di almancul 20 dîs. Il president, sintût il parê dal Comitât, al nomene il segretari.

Il Comitât
Art.5

Il Comitât al cjape dentri il president e chei altris cuatri membris. Se al è pussibil, chescj a àn di rapresentâ, cu la incarghe di vicepresident, lis cuatri parts gjeografichis dal Friûl, Udinês, Gurizan, Pordenonês e Cjargne; se par une part dal teritori si varà plui di un membri, al sarà vicepresident chel plui intimpât.
Il Comitât si da dongje almancul trê voltis ad an e al dure inte sô incarghe doi agns. Al à i compits di studiâ e di meti in vore lis risoluzions de Assemblee a rivuart dai fins de Union. Al deleghe i rapresentants de Union intai incuintris publics, e al decidît su lis domandis di adesion di socis gnûfs.

Il segretari
Art.6

Il segretari al ten i verbâi des sintadis, l’archivi e la casse de Union. Al jude il president e il Comitât tal davuelzi lis ativitâts de Union.

I revisôrs dal cont
Art.7

I revisôrs dal cont a son trê efetîfs, plui un suplent. A restin inta cheste incarghe doi agns.

Lis proceduris
Art.8

Si jentre inte Union fasint la domande par scrit e daûr de presentazion de bande di doi socis. I tocje al Comitât di acetâ, o ben di refudâ, la amission.

Art.9

Dutis lis votazions si fasilis a maiorance sempliç dai socis presints. La Cjarte de Union si pues mendâle cu la maiorance sempliç dai socis, o ben cui doi tierçs dai socis presints inte Assemblee.

Art.10

La Assemblee straordenarie si le da dongje se lu decît il Comitât, o ben se lu domande la maiorance sempliç dai socis.

Art.11

Par disfâ la Union e covente une votazion cu la maiorance dai doi tierçs dai socis. In chel câs, i bêçs che a fossin inte casse de Union si ju darès a une organizazion cristiane.

Art.12

Par chel che no proviôt cheste Cjarte, a valin lis disposizions dal Codiç Civîl talian. La Union e à la sô sede tal Palaç dal Patriarcje a Udin.


Inte Assemblee dai 06/11/2010, la maiorance dai presints e à deliberât une modifiche al statût, proponude dal segretari Massim Duca: invezit di trê revisôrs dai conts si indi varà un, plui un suplent.